*DOQC GING SOU:
+ Singx Nzung 31:6-9
+ 2 Zunh Doic Douh 35; Gong-Zoh 26:28-27:8
*IH HNOI NYEI GING SOU:
Yie yiem siem nyei dorngx heuc jienv meih. Ziouv aac, tov meih muangx yie nyei sing-qiex. (Singx Nzung 130:1b-2a)
Wuov dauh m’zing maengh mienh ziouc heuc, “Ndaawitv Hungh nyei Zeiv-Fun, Yesu aah! Korv-lienh yie maah!” Mingh ndaangc wuov deix hemx ninh, “Maiv dungx ko lo maah!” Mv baac ninh jaa heuc gauh mbui deix, “Ndaawitv nyei Zeiv-Fun aah! Korv-lienh yie maah!” (Lugaa 18:38-39)
*ZA’EIX TENGX DAUX GAUX:
Ziouv aac, yie laengz duqv camv lengc jeiv haic nyei ginc gan i laanh mienh yiem i yiemc Ging Sou ih hnoi: Daaix sic da’yietv laanh duqv wuic jiec taux Ziouv camv yiem ninh nyei ziangh maengc aqv. Daaix sic ninh tov Ziouv njoux camv nzunc yaac duqv Ziouv dau njoux ninh cuotv nqoi buangh zuqc nyei sic kouv nyei. Ih zanc ninh buangh nyei sic gengh seix haic; weic ninh ganh nyei qaqv, nyei buoz dauh ninh mv haih leih nqoi cuotv daaih. Ninh zuqc tov Ziouv njoux weic hiuv se Ziouv haih dau nyei; weic suonc nyei hnamv nor Ziouv mbenc ziangx guangc zuiz yaac ken ninh jiez sin daaih maiv gunv ninh king njiec, yietc zungv huaang nzengc yiem lingh wuonh nyei buonc.
Aengx taux wuov dauh mienh nyei m’zing maengh nyei mienh buangh zuqc nyei sic gengh hmuangx yaac mv maaih laamh hnamv. Daaix sic ninh mv gengh duqv wuic jiex Ziouv nyei hnamv. Daaix sic ninh kungx haiz waac weic camv mienh caangh laangh gorngv taux Ziouv Yesu hnangv. Mv baac lengc jeiv nyei se ninh hiuv duqv naaiv dauh fin saeng haih maaih hatc lingc zorc duqv longx bun ninh. Weic ninh sienx dingc hnangv naaic nor ninh qaqv heuc mbui maiv gunv buangh zuqc camv mienh nqaeqv jienv ninh, hemx yaac gorngv ninh weic ninh mbuo mv maaih sienx fim, yaac mv guaax hnyouv tengx, mv korv-lienh tengx mv baac aengx nqaeqv jienv ninh, hemx ninh. Kungx weic oix mangc, ninh mbuo tiux jienv caux camv mienh mingh oix mangc buatc Ziouv Yesu yaac muangx Ziouv gorngv. Kungx maaih ninh nor ninh kungx qaqv heuc Ziouv njoux; mv baac ninh maaih sienx fim yiem Ziouv Yesu. Yie zuqc hoqc jienv ei ninh nyei gingx: maiv gunv yie buangh zuqc nyungc sic gengh kouv nyei yie yaac zuqc sienx dingc yiem Ziouv nyei hatc lingc caux Ziouv nyei hnamv yaac dingc za’eix gunv liemh zeih tov Ziouv njoux.