Hruê 4 – Mlan 05

• 

• 

DLĂNG KLEI AÊ DIÊ BLŬ:

* Klei Mmuñ Hđăp 59:1-9

* Bruă Lêwi 26:36-27:15; Y-Markôs 9:1-10

ÊLAN KLEI AÊ DIÊ BLŬ HLĂM HRUÊ:

Diih srăng ƀơ̆ng huă êbeh dlai leh anăn trei,

leh anăn diih srăng bi mni kơ anăn Yêhôwa Aê Diê diih.

(Y-Yôel 2:26)

Yêsu mă êma klŏ kpŭng leh anăn dua drei kan, Ñu angưi ală phă adiê, bi mni kơ Aê Diê. Ñu kjoh kpŭng leh anăn brei kơ phung ƀĭng kna bi mbha kơ phung ƀuôn sang. Leh anăn Ñu bi mbha mơh dua drei kan anăn kơ jih jang digơ̆. Jih jang digơ̆ ƀơ̆ng leh anăn trei sơăi. (Y-Markôs 6:41-42)

ĐRU KČĔ KLEI WAH LAČ:

Ơ Khua Yang, kâo bi mni lač jăk kơ Khua Yang kyua brei leh kơ kâo djăp mnơ̆ng ƀơ̆ng huă, čhum ao hơô grăp hruê. Akâo Khua Yang thiăm brei kơ phung dôk hlăm klei kƀah čiăng dưi djăp mnơ̆ng yua. Akâo Khua Yang bi êdah kơ phung mnuih hmei thâo jih jang mnơ̆ng hmei mâo jing mơ̆ng Khua Yang brei čiăng kơ hmei bi mni kơ Khua Yang, hdơr knga kơ Khua Yang, mpŭ mni Khua Yang. Akâo Khua Yang mtrŭt hmei hdĭp thâo kah mbha, hdĭp hŏng klei êhăk êhai čiăng bi êdah klei khăp Khua Yang. Bi mni kơ Khua Yang.

Hruê 3 – Mlan 04

• 

• 

DLĂNG KLEI AÊ DIÊ BLŬ:

* Klei Mmuñ Hđăp 58

* Bruă Lêwi 26:1-35; Y-Markôs 8:22-38

ÊLAN KLEI AÊ DIÊ BLŬ HLĂM HRUÊ:

Đăm tăm pah ôh kơ sa čô kngăl amâodah dưm mnơ̆ng bi têč hnêč ti anăp mnuih bum ală, ƀiădah brei ih huĭ mpŭ kơ Aê Diê ih. Kâo jing Yêhôwa. (Bruă Lêwi 19:14)

“Brei diih thâo pap msĕ si Ama diih thâo pap.” (Y-Luk 6:36)

ĐRU KČĔ KLEI WAH LAČ:

Ơ Khua Yang, êlan Klei Aê Diê Blŭ hruê anei mtô kâo luă gŭ, dôk dơ̆ng hŏng klei khăp kơ phung joh kiê djiê kngan. Amâo mưč mač, amâo dlăng mdê, amâo kah phung; leh anăn boh nik amâo ngă mnêč hŏng klei hgăm kơ digơ̆ têč hnêč leh anăn tlao mưč digơ̆. Ƀiădah brei kâo thâo khăp kơ mnuih mkăn msĕ si Khua Yang khăp kơ kâo. Snăn, wăt mâo mnuih bi êmut kơ kâo amâodah ngă klei amâo djŏ hŏng kâo snăn kâo amâo lŏ bi wĭt klei ngă jhat amâodah đuĕ kbưi mơ̆ng digơ̆. Mlih kơ anăn brei kâo khăp kơ digơ̆ truh hnơ̆ng đru digơ̆ ƀuh klei soh leh anăn lŏ mkra wĭt, bi êdah klei khăp hŏng klei dôk dơ̆ng leh anăn amâo lŏ guôn klei bi wĭt mơ̆ng digơ̆. Lŏ bi mĭn wĭt kơ hruê êgao leh, kâo amâo ngă hluê ôh msĕ klei Khua Yang mtô mtă. Akâo Khua Yang pap brei kơ kâo. Kâo čuăn hdĭp huĭ mpŭ kơ Khua Yang, hdơr pioh klei hriăm hruê anei čiăng ngă nanao grăp hruê.

Hruê 2 – Mlan 05

• 

• 

DLĂNG KLEI AÊ DIÊ BLŬ:

* Klei Mmuñ Hđăp 57:7-11

* Bruă Lêwi 25:18-55; Y-Markôs 8:14-21

ÊLAN KLEI AÊ DIÊ BLŬ HLĂM HRUÊ:

Ơ, čiăng snăk kơ phung ƀuôn sang Kâo dôk hmư̆ Kâo.

(Klei Mmuñ Hđăp 81:13a)

Knŏng tơdah diih ăt dôk kjăp hlăm klei đăo, amâo kpleh mơ̆ng klei čang hmăng kbiă hriê mơ̆ng Klei Mrâo Mrang Jăk diih hmư̆ leh.  (Kôlôs 1:23)

ĐRU KČĔ KLEI WAH LAČ:

Ơ Khua Yang, bi mni kơ Khua Yang kyua kâo dưi hmư̆ kơ Khua Yang, đăo leh anăn kkuh mpŭ kơ Khua Yang. Akâo Khua Yang đru phung đăo kơ Khua Yang ăt djă pioh klei đăo ktang hĭn kơ Khua Yang, sĭt suôr hŏng Khua Yang čiăng đăm lĕ hlăm klei mplư đăo hlue klei mkŏ mjing, mtô Klei Aê Diê Blŭ soh čhuai, boh nik hlăm ênuk knhal tuč anei. Akâo Khua Yang mtrŭt ai tiê phung khua gĭt gai, phung amĭ ama uêñ mtô Klei Aê Diê Blŭ kơ phung ênuk êdei, ngă hlue knhuah hdĭp huĭ mpŭ kơ Khua Yang čiăng dưi dôk kjăp hlăm klei đăo kơ Pô Bi Mtlaih. Bi mni Khua Yang.

Hruê 1 – Mlan 05

• 

• 

DLĂNG KLEI AÊ DIÊ BLŬ:

* Klei Mmuñ Hđăp 57:1-6

* Bruă Lêwi 24:10-25:17; Y-Markôs 8:1-13

ÊLAN KLEI AÊ DIÊ BLŬ HLĂM HRUÊ:

Kyuadah Kâo dôk mbĭt hŏng ih čiăng bi mtlaih ih” Yêhôwa lač.

 (Y-Yêrêmi 30:11a)

Kyuadah Ñu pô tŭ leh klei knap mñai êjai tuôm hŏng klei mplư, snăn Ñu dưi đru phung tuôm hŏng klei mplư. (Hêbrơ 2:18)

ĐRU KČĔ KLEI WAH LAČ:

Ơ Khua Yang, êlan Klei Aê Diê Blŭ hruê anei lŏ mñă kơ kâo: tơdah kâo ngă soh snăn kâo srăng mă tŭ boh mơ̆ng klei soh. Wăt snăn, Khua Yang amâo lui kâo ôh, Khua Yang ăt bi mtlaih kâo. Bi mni kơ Khua Yang! Kâo wah lač bi ala kơ phung đăo kơ Khua Yang tuôm hŏng klei mplư ăt adôk nanao hlăm klei soh amâodah phung adôk hlăm klei hêñ kyua tuôm ngă klei soh leh. Akâo Khua Yang mtrŭt phung đăo kơ Khua Yang brei hmei yua klei blŭ, hŏng klei čih hră mơĭt, ngă klei duê kơ klei bi mđĭ ai, mñă kơ digơ̆ brei mâo klei jhŏng akâo klei pap leh anăn klei bi mtlaih mơ̆ng Khua Yang; amâodah ƀiă êdi hmei ăt mơĭt êlan Klei Aê Diê Blŭ hruê anei kơ digơ̆… čiăng kơ digơ̆ thâo Khua Yang ăt khăp kơ digơ̆, ăt kăp đru digơ̆ dưi găn klei jing ară anei, čiăng kơ digơ̆ kmhal, akâo Khua Yang pap brei kơ klei soh leh anăn Ñu bi grăng hŏng klei bi mguôp digơ̆ hŏng Khua Yang. Bi mni kơ Khua Yang.    

MLAN 05

• 

“Jih jang mnơ̆ng kâo mâo klei dưi ngă sơăi,”

 ƀiădah amâo djŏ jih jang mnơ̆ng ôh jing tŭ dưn ôh.

 (I Kôrantô 6:12)

Hruê 30 – Mlan 04

• 

• 

DLĂNG KLEI AÊ DIÊ BLŬ:

* Klei Mmuñ Hđăp 56:9-13

* Bruă Lêwi 23:23-24:9; Y-Markôs 7:24-37

ÊLAN KLEI AÊ DIÊ BLŬ HLĂM HRUÊ:

Ơ Yêhôwa, brei Ih hdơr kơ klei Ih pap leh anăn kơ klei Ih khăp sĭt suôr,

kyuadah diñu jing mơ̆ng ênuk hlŏng lar.

(Klei Mmuñ Hđăp 25:6)

Ƀiădah tơdah klei jăk leh anăn klei khăp Aê Diê, Pô Bi Mtlaih drei, bi êdah leh, Ñu bi mtlaih leh drei, amâo djŏ kyua bruă kpă drei ngă leh ôh, ƀiădah tui si klei Ñu pô pap, hŏng klei bi doh kbiă hriê mơ̆ng klei lŏ bi kkiêng mrâo, leh anăn klei lŏ bi mrâo hŏng Yang Mngăt Jăk (Y-Tit 3:4-5)

ĐRU KČĔ KLEI WAH LAČ:

Ơ Khua Yang, mni lač jăk kơ Khua Yang kyua bi êdah leh ai tiê thâo pap leh anăn klei jăk Khua Yang kơ phung mnuih hmei. Tơdah đăo kơ Khua Yang Yêsu kâo mâo klei pap brei kơ klei soh, dưi mâo klei bi mlih mrâo hŏng klei myang mơ̆ng Yang Mngăt Jăk. Kâo amâo hdĭp hlăm klei gĭt gai mơ̆ng klei soh dơ̆ng ôh. Ară anei hin kâo hdĭp hlăm klei hdĭp mrâo, ngă bruă djŏ ti gŭ klei Yang Mngăt Jăk atăt gai. Kâo čang hmăng djă pioh klei khăp klei bi mtlaih mơ̆ng Khua Yang brei amâo djŏ ôh kyua klei jăk kâo pô. Kyua anăn, kâo amâo jhŏng hưn ktưn, amâodah akâo Khua Yang ngă klei kâo pô čiăng ôh. Kâo čuăn srăng kriăng hriăm Klei Aê Diê Blŭ, wah lač hŏng Khua Yang čiăng kơ grăp hruê kâo mâo klei thâo ƀuh hŏng klei Khua Yang gĭt gai ngă hluê klei Khua Yang čiăng. Bi mni kơ Khua Yang.

Hruê 29 – Mlan 04

• 

• 

DLĂNG KLEI AÊ DIÊ BLŬ:

* Klei Mmuñ Hđăp 56:1-8

* Bruă Lêwi 22:17-23:22; Y-Markôs 7:9-23

ÊLAN KLEI AÊ DIÊ BLŬ HLĂM HRUÊ:

Yêhôwa jing kpă, bi kâo lĕ, kâo bi kdơ̆ng leh hŏng klei Ñu blŭ. (Klei Čŏk Hia 1:18a)

 “Ya diih mĭn? Sa čô mnuih mâo dua čô anak êkei. Ñu nao lač kơ pô êlâo, ‘Ơ dam, hruê anei brei ih nao mă bruă hlăm đang boh kriăk ƀâo.’  Gơ̆ lŏ wĭt lač, ‘Kâo amâo nao ôh,’ ƀiădah ƀiăriă tinăn gơ̆ bi mlih klei mĭn leh anăn nao.

(Y-Mathiơ 21:28-29)

ĐRU KČĔ KLEI WAH LAČ:

Ơ Khua Yang, dua êlan Klei Aê Diê Blŭ hruê anei ngă kơ kâo lŏ dlăng wĭt kâo hdĭp gưt hluê Khua Yang mơ̆? Klei wĭt lač jing AMÂO ÔH. Kâo knŏng čiăng leh anăn mơak tơdah ngă klei kâo khăp. Êjai anăn Khua Yang čiăng kơ kâo ngă hluê Klei Khua Yang blŭ. Akâo Khua Yang pap brei klei soh kâo. Kâo čuăn hriăm Klei Aê Diê Blŭ lu hĭn čiăng kơ Klei Khua Yang Blŭ mtrŭt kâo grăp hruê hriăm hdĭp gưt asăp kơ Khua Yang.

Kâo ăt wah lač kơ phung amĭ ama uêñ mĭn mtô bi hriăm phung anak thâo gưt asăp amĭ ama, hriăm gưt asăp ngă hluê klei Khua Yang mtô hlăm Klei Aê Diê BLŭ êjai diñu hlăk hđeh čiăng klei Klei Aê Diê Blŭ kma êlam hlăm phung anak čiăng jih klei hdĭp amâo lui Khua Yang ôh. Klă anăp jing mtô phung anak knhuah hdĭp sa čô pô đăo msĕ si: bi hriăm klei yăl dliê hlăm Klei Aê Diê Blŭ, hriăm mmuñ klei muñ kkuh mpŭ pioh kơ phung hđeh, hriăm tuč Klei Aê Diê Blŭ, mtô phung anak amâo mnăm kpiê biêr, amâo djŭp hăt, amâo bi dôk ung mô̆ hŏng phung ka đăo, thâo khăp, thâo đru pô mkăn… bi mni kơ Khua Yang.

Hruê 28 – Mlan 04

• 

• 

DLĂNG KLEI AÊ DIÊ BLŬ:

* Bruă Phung Khua Ƀĭng Kna 8:26-40; Klei Mmuñ Hđăp 22:25-31

* I Y-Yôhan 4:7-21; Y-Yôhan 15:1-8

ÊLAN KLEI AÊ DIÊ BLŬ HLĂM HRUÊ:

Brei ai tiê kâo thâo huĭ mpŭ kluôm dhuôm kơ anăn Ih.

(Klei Mmuñ Hđăp 86:11b)

Kyuanăn Aê Diê mpŭ kơ Ñu ti dlông snăk, leh anăn brei kơ Ñu anăn ti dlông hĭn kơ jih jang anăn, čiăng kơ ti anăp anăn Yêsu jih jang phung hlăm adiê, ti lăn ala, leh anăn ti gŭ lăn ala srăng čuôn kơŭt, leh anăn jih jang êlah srăng hưn kơ Yêsu Krist jing Khua Yang, čiăng bi guh kơang Aê Diê Ama. (Philip 2:9-11)

ĐRU KČĔ KLEI WAH LAČ:

Ơ Khua Yang, hruê anei kâo wah lac kơ phung đăo kơ Krist dôk đing, ka thâo klă ôh klei Khua Yang čiăng hŏng klei Khua Yang iêu jak digơ̆ mŭt hlăm bruă hiu hưn. Akâo Khua Yang mtô bi hriăm  digơ̆ thâo klei Khua Yang čiăng, hdră bruă mơ̆ng Khua Yang, čiăng kơ digơ̆ thâo klă klei Khua Yang iêu mthưr digơ̆ hlăm bruă hiu hưn, leh anăn digơ̆ nao, hưn anăn Khua Yang kơ phung ka đăo hlăm lu anôk ka tuôm hmư̆ kơ Khua Yang Yêsu, đăo kơ Khua Yang jing Pô Bi Mtlaih. Akâo Khua Yang đru digơ̆ sĭt suôr hlăm bruă digơ̆ mă tŭ leh tui si klei Khua Yang čiăng. Bi mni kơ Khua Yang.

Hruê 27 – Mlan 04

• 

• 

DLĂNG KLEI AÊ DIÊ BLŬ:

* Klei Mmuñ Hđăp 55:20-23

* Bruă Lêwi 21:13-22:16; Y-Markôs 7:1-8

ÊLAN KLEI AÊ DIÊ BLŬ HLĂM HRUÊ:

Ih lač, ‘Kâo amâo soh ôh; sĭt nik klei ñu ăl wir đuĕ leh mơ̆ng kâo.

Nĕ anei, kâo srăng atăt ba ih kơ klei phat kđi,

kyuadah ih lač, ‘Kâo amâo tuôm ngă soh ôh.

(Y-Yêrêmi 2:35)

Leh anăn ñu lač, “Ơ Yêsu, brei Ih hdơr kơ kâo tơdah Ih srăng hriê jing mtao hlăm ƀuôn ala mtao Ih.”  (Y-Luk 23:42)

ĐRU KČĔ KLEI WAH LAČ:

Ơ Khua Yang, kâo thâo săng êlan Klei Aê Diê Blŭ tal sa lač kơ jih jang mnuih ngă soh leh sơaĭ kyua anăn amâo dưi ôh lač: “kâo amâo soh ôh. Sĭt nik klei Ñu ăl wir đuĕ leh mơ̆ng kâo.” Wăt kơ kâo amâo čŏng čiăng amâodah tăm ngă klei soh điêt anăn ăt jing ngă soh ti anăp Aê Diê. Akâo Khua Yang đru kâo thâo wir dlăng kơ kâo pô, thâo kral klei soh, kmhal hŏng Khua Yang čiăng dưi mâo klei Khua Yang pap brei. Tơdah kâo ăt mgao lač kơ pô amâo soh ôh snăn Khua Yang srăng phat kđi jih jang knhuah hdĭp, klei mĭn, bruă ngă soh jhat kâo. Kâo čang hmăng srăng čuăn dôk răng hlăm klei mĭn, klei blŭ kâo pô. Bi mni Khua Yang.

Hruê 26 – Mlan 04

• 

• 

DLĂNG KLEI AÊ DIÊ BLŬ:

*  Klei Mmuñ Hđăp 55:16-19

*  Bruă Lêwi 20:9-21:12; Y-Markôs 6:45-56

ÊLAN KLEI AÊ DIÊ BLŬ HLĂM HRUÊ:

Huĭ mpŭ bĕ kơ Aê Diê leh anăn djă pioh klei Ñu mtă; kyuadah klei anăn jing jih klei djŏ brei mnuih ngă. (Khua Pô Mtô 12:13b)

Yêsu lŏ wĭt lač, “Klei bhiăn tal êlâo jing, ‘Hmư̆ bĕ, Ơ phung Israel! Khua Yang Aê Diê drei jing Khua Yang mâo knŏng sa čô; brei ih khăp kơ Khua Yang Aê Diê ih hŏng jih ai tiê, hŏng jih mngăt, hŏng jih klei mĭn, leh anăn hŏng jih ai ktang ih.’  Anei klei bhiăn tal dua, ‘Brei ih khăp kơ pô riêng gah ih msĕ si kơ ih pô.’ Amâo lŏ mâo klei bhiăn prŏng hĭn kơ dua mta anăn ôh.” (Y-Markôs 12:29-31)

ĐRU KČĔ KLEI WAH LAČ:

Ơ Khua Yang, dua êlan Klei Aê Diê Blŭ hruê anei mă bruă ktang tĭt hlăm ai mĭn kâo, mtrŭt kâo bi mĭn klei hdĭp kâo tui hluê Khua Yang. Kâo ăt adôk brei klei tluh, klei hlăp mbŭl hlăm klei hdĭp gĭt gai kâo mlih kơ klei dưh knang kơ Khua Yang, amâo brei ôh Khua Yang gĭt gai klei kâo ruah hlăm klei hdĭp. Kâo dôk hdĭp kyua klei tŭ dưn kơ kâo pô mlih kơ klei thâo uêñ thâo khăp, mĭn kơ phung Khua Yang mdưm leh ti djiêo kâo. Kâo čang hmăng kâo srăng jih ai tiê, jih mngăt, jih ai mĭn, jih ai ktang huĭ mpŭ kơ Khua Yang leh anăn khăp kơ pô riêng gah, ngă bi leh bruă klam Khua Yang jao leh kơ kâo. Bi mni kơ Khua Yang.