Hnoi 04 – Hlaax 05

• 

• 

DOQC GING SOU:

+ Singx Nzung 59:1-9

+ Lewi 26:36-27:15; Maako 9:1-10

IH HNOI NYEI GING SOU:

Meih mbuo duqv nyanc gaux, duqv nyanc beuv nzengc. Meih mbuo ziouc ceng Ziouv, meih mbuo nyei Tin-Hungh nyei mengh. (Yo^en 2:26)

Yesu ziouc zorqv wuov deix biaa norm njuov caux I dauh mbiauz, cau hmien mangc lungh, laengz zingh Tin-Hungh liuz, ziouc maeqv nqoi njuov bun sai-gorx bun nqoi zuangx mienh. Wuov deix mbiauz ninh yaac bun nqoi zuangx mienh. Zuangx mienh duqv nyanc beuv nzengc. (Maako 6:41-42)

ZA’EIX TENGX DAUX GAUX:

Ziouv aac, yie laengz zingh Ziouv weic Ziouv bun yie yietc hnoi maaih lui-houc zuqv, maaih hnangx nyanc beuv. Tov Ziouv tengx wuov deix mienh ih zanc qiemx zuqc nyanc hopv nyei bun ninh mbuo maaih gaux nyanc gaux longc. Tov Ziouv biux mengh haih bun baamh mienh yie mbuo hiuv nyungc-nyungc yie mbuo maaih nyei se weic Ziouv ceix bun haih bun yie mbuo laengz zingh Ziouv, dor-ziec Ziouv yaac ceng Ziouv. Tov Ziouv kuinx yie mbuo hoqc bun cuotv, tengx bun camv nyei haih biux mengh hnyouv hnamv. Laengz zingh Ziouv.

Hnoi 03 – Hlaax 05

• 

• 

DOQC GING SOU:

+ Singx Nzung 58

+ Lewi 26:1-35; Maako 8:22-38

IH HNOI NYEI GING SOU:

Maiv dungx zioux m’normh ndung nyei mienh. Yaac maiv dungx zorqv ga’naaiv an jauv bun m’zing maengh nyei mienh ndiqv zuqc ndorpc. Oix zuqc gamh nziex, taaih meih nyei Tin-Hungh. Yie se Ziouv. (Lewi 19:14)

Meih mbuo oix zuqc korv-lienh mienh hnangv meih mbuo nyei Zaangc Diex korv-lienh mienh wuov nor. (Lugaa 6:36)

ZA’EIX TENGX DAUX GAUX:

Ziouv aac, waac Ging Sou ih hnoi njaaux yie taaih yaac hnamv wuov deix mienh nyanc duqv maiv zoux duqv gong nyei mienh. Maiv mangc piex, maiv leih go, maiv nqemh ninh mbuo. Lengc jeiv nyei se maiv zeiz bingx jienv zoux bun ninh mbuo ndopc yaac qaqv jatv ninh mbuo mv baac zuqc hnamv ninh mbuo hnangv Ziouv hnamv yie wuov nor. Maiv gunv hnangv naaic, se gorngv maaih mienh nzorng yie fai zoux nyungc sic dorngc yie nor yie maiv jaauv-win fai leih go ninh mbuo. Daaux nzuonx yie horpc zuqc hnamv ninh mbuo, tengx ninh mbuo haih goiv zorc dongh ninh mbuo zoux dorngc sic, biux mengh hnyouv hnamv gan nyungc sic se zoux longx yaac maiv qiemx ninh mbuo jaauv en yie. Dimv mangc ziangh hoc jiex mingh, yie maiv gengh zoux hnangv Ziouv njaaux yie. Tov Ziouv guangc zuiz bun yie. Yie tov cuotv za’eix dingc hnyouv taaih Ziouv, jangx jienv ih hnoi yie hoqc hiuv nyei ginc haih bun yie zoux jienv hnoi-hnoi nyei.

Hnoi 02 – Hlaax 05

• 

• 

DOQC GING SOU:

+ Singx Nzung 57:7-11

+ Lewi 25:18-55; Maako 8:14-21

IH HNOI NYEI GING SOU:

Feix duqv yie nyei baeqc fingx muangx yie nyei waac. (Singx Nzung 81:13a)
Mv baac meih mbuo oix zuqc gan longx meih mbuo sienx nyei doz, liepc gorn-ndoqv wuonv, yaac maiv dungx bungx guangc dongh bun meih mbuo maaih lamh hnamv nyei kuv fienx. Naaiv se meih mbuo haiz nyei kuv fienx. 

(Ko^lo^si 1:23)

ZA’EIX TENGX DAUX GAUX:

Ziouv aac, laengz zingh Ziouv bun yie duqv muangx hiuv taux Ziouv, sienx zipv Ziouv. Tov Ziouv tengx yie caux mouz laanh Giduc mienh maiv dingh liouh zoux bun sienx fim gauh duqv wuonv yiem Ziouv, ziepc zuoqv gapv Ziouv haih maiv zuqc yuoqc nyei sic zoux bun yie mbuo sienx gan jienv dorngc leiz gorngv taux Ziouv, lengc jeiv nyei se yiem setv mueiz nyei ziangh hoc naaiv. Tov Ziouv kuinx wuov deix bieiv zeiv, wuov deix zoux diex maac nzauh nyei njaaux Ziouv nyei waac bun mingh jienv nyei yietc doic, hoqc zoux nyungc-nyungc haih bun ganh nyei ziangh maengc taaih Ziouv haih bun ganh nyei sienx fim souv wuonv yiem Njoux Ziouv. Laengz zingh Ziouv.

Hnoi 01 – Hlaax 05

• 

• 

DOQC GING SOU:

+ Singx Nzung 57:1-6

+ Lewi 24:10-25:17; Maako 8:1-13

IH HNOI NYEI GING SOU:

Ziouv hnangv naaiv gorngv, ‘Yie caux meih yiem weic njoux meih.”

(Ye^le^mi 30:11a)

Weic ninh ganh zuqc seix jiex yaac zuqc siouc kouv, ninh cingx daaih haih tengx zuqc seix nyei mienh. (Hipv^lu 2:18)

ZA’EIX TENGX DAUX GAUX:

Ziouv aac, waac Ging Sou ih hnoi tih fingv yie: dongh yie baamz zuiz nor yie horpc zuqc laengz cuotv daaih nyei sic. Maiv gunv hnangv naaic, Ziouv maiv guangc yie, Ziouv yaac njoux yie. Laengz zingh Ziouv! Yie tov daux gaux bun wuov deix Giduc mienh ih zanc zuqc yuoqc baamz jienv zuiz fai mienh haiz nyaiv haic weic ndangc hingv baamz zuiz. Tov Ziouv kuinx Giduc mienh yie mbuo gan waac gorngv, gan fiev fienx, fiev nzung-eix orn hnyouv, kuinx ninh mbuo damv hlo nyei tov Ziouv guangc zuiz yaac njoux; fai juix bun ninh mbuo ih hnoi nyei Ging Sou… haih bun ninh mbuo hiuv duqv Ziouv yaac hnamv ninh mbuo nyei, mbenc ziangx tengx ninh mbuo mingh piatv ninh mbuo ih zanc buangh zuqc nyei sic, haih bun ninh mbuo goiv hnyouv tov Ziouv guangc zuiz yaac duqv Ziouv aengx zoux bun ninh mbuo duqv zoux longx gapv Ziouv. Laengz zingh Ziouv.

HLAAX 05

• 

Maaih mienh oix gorngv, “Haaix nyungc yie maaih leiz zoux duqv nyei.” Zeiz nyei, mv baac maiv zeiz nyungc-nyungc maaih lamh longc. (1 Ko^lin^to 6:12)

Hnoi 30 – Hlaax 04

• 

• 

DOQC GING SOU:

+ Singx Nzung 56:9-13

+ Lewi 23:23-24:9; Maako 7:24-37

IH HNOI NYEI GING SOU:

O Ziouv aac, tov meih jangx jienv meih korv-lienh mienh yaac ziepc zuoqv nyei hnamv mienh, weic zuqc loz-hnoi m’daaih hnangv naaic. (Singx Nzung 25:6)

Mv baac mbuo nyei Njoux Ziouv Tin-Hungh bun cing ninh zoux longx yaac hnamv mienh wuov zanc, ninh njoux mbuo. Se maiv zeiz weic mbuo zoux nyei haaix nyungc kuv sic, se weic Tin-Hungh ganh korv-lienh mbuo. Ninh longc Singx Lingh nzaaux mbuo, bun mbuo siang-yungz jiex. (Tidatc 3:4-5)

ZA’EIX TENGX DAUX GAUX:

Ziouv aac, laengz zingh Ziouv biux mengh hnyouv ndaauv caux hnyouv suonc caux baamh mienh yie mbuo. Dongh sienx zipv Ziouv Yesu nor yie duqv Ziouv guangc zuiz, duqv goiv siang jiez daaih weic Singx Lingh nyei hatc lingc. Yie maiv zeiz yiem jienv mienv nyei buoz ndiev aqv. Ih zanc yie ziangh se siang ziangh maengc, zoux nyungc-nyungc gong horpc nyei weic Singx Lingh dorh yaac njaaux. Yie gengh hnamv se oix jangx jienv yiem hnyouv se Ziouv hnamv yaac njoux yie se weic Ziouv ceix bun maiv zeiz weic yie longx nor cingx haih duqv. Weic hnangv naaic, yie maiv ceng hlo yie ganh fai oix Ziouv zuqc zoux ei jienv yie nyei za’eix zoux. Yie tov dingc hnyouv zienh nyei doqc Ging Sou, daux gaux gapv Ziouv haih bun yie hnoi-hnoi gauh hiuv ndorc Ziouv njaaux yaac dorh jauv haih bun yie muangx yaac zoux jienv mingh. Laengz zingh Ziouv.

Hnoi 29 – Hlaax 04

• 

• 

DOQC GING SOU:

+ Singx Nzung 56:1-8

+ Lewi 22:17-23:22; Maako 7:9-23

IH HNOI NYEI GING SOU:

Ziouv zoux duqv horpc weic zuqc yie ngaengc jienv ninh nyei waac.

(Naanc Zingh Nzung 1:18a)

Meih mbuo hnangv haaix nor hnamv? Maaih laanh mienh maaih i dauh dorn. Ninh mingh mbuox dorn-hlo, ‘Dorn aac, meih ih hnoi mingh a’ngunc huingx zoux gong oc.’ (Matv^taai 21:28-29)

ZA’EIX TENGX DAUX GAUX:

Ziouv aac, i yiemc Ging Sou ih hnoi zoux bun yie dimv mangc yie ganh, yie yaac ziangh muangx jienv Ziouv nyei waac nyei fai? Dau nyei waac se MAIV MAAIH. Yie kungx hnamv yaac kungx haiz a’hneiv dongh yie zoux ei yie ganh nyei za’eix. Mv baac Ziouv oix yie zoux ei jienv Ziouv nyei za’eix. Tov Ziouv guangc zuiz bun yie. Yie tov dingc hnyouv hoqc Ziouv nyei waac gauh camv deix haih bun Ziouv nyei waac kuinx yie hnoi-hnoi hoqc zoux jienv ei Ziouv nyei waac.

Yie yaac tov daux gaux bun wuov deix zoux dae maa haih njaaux ninh  mbuo nyei fu’jueiv hiuv muangx dae maa nyei waac gorngv, hoqc muangx waac yaac zoux jienv ei Ziouv njaaux nyei waac yiem Ging Sou dongh ziangh hoc ninh mbuo nye hnyangx jeiv zeiz faix nyei haih bun Ziouv nyei waac ziangh ndo nyei yiem ninh mbuo nyei hnyouv zoux bun ninh mbuo hlo jiez fai gox mingh yaac mv haih guangc Ziouv. Ndorc nyei se njaaux fu’jueiv taux: gorngv taux Ging Sou nyei loz hnoi gouv, hoqc baaux nzung bun fu’jueiv nyei nzung, doqc bun jangx Ging Sou, njaaux fu’jueiv maiv dungx buov in, hopv diuv, maiv dorng-jaa caux mienh maiv gengh sienx zipv Ziouv, maaih hnyouv hnamv taux mienh muoz,… Laengz zingh Ziouv.

Hnoi 28 – Hlaax 04

• 

• 

DOQC GING SOU:

+ Gong-Zoh 8:26-40; Singx Nzung 22:25-31

+ 1 Yo^han 4:7-21; Yo^han 15:1-8

IH HNOI NYEI GING SOU:

Tov bun yie zunv dingc hnyouv, weic taaih meih nyei mbuox.

(Singx Nzung 86:11b)

Weic naaiv Tin-Hungh taaih ninh zoux gauh hlo jiex, yaac bun ninh maaih mbuox gauh hlang jiex maanc mbuox nyei mbuox. Hnangv naaiv, weic taaih Yesu nyei mbuox, yiem tin-dorngh, yiem yaangh gen, caux yiem yiemh gen nyei yietc zungv oix zuqc gueic njiec baaix. Dauh dauh oix nyiemc Yesu Giduc zoux Ziouv, ziouc taaih Zaangc Diex Tin-Hungh. (Fi^lipv^poi 2:9-11)

ZA’EIX TENGX DAUX GAUX:

Ziouv aac, ih hnoi yie tov daux gaux bun wuov deix Giduc mienh ih zanc yiem hnyouv hnamv maiv hiuv ndorc Ziouv nyei za’eix caux nyungc gong se Ziouv heuc ninh mbuo zoux zunh kuv fienx nyei gong. Tov Ziouv bun ninh mbuo hiuv Ziouv nyei za’eix, Ziouv nyei jauv, gong-gor, haih bun ninh mbuo hiuv duqv dingc nyei se Ziouv heuc ninh mbuo bieqc zunh kuv fienx nyei gong, liuz ninh mbuo haih cuotv mingh gorngv taux Ziouv bun wuov deix mienh mv gengh sienx zipv Ziouv yiem camv norm dorngx duqv muangx taux Ziouv Yesu yaac sienx zipv Ziouv se Njoux Ziouv. Tov zoux bun ninh mbuo ziepc zuoqv nyei gapv nyungc gong ninh mbuo laengz ei jienv Ziouv nyei za’eix. Laengz zingh Ziouv.

Hnoi 27 – Hlaax 04

• 

• 

DOQC GING SOU:

+ Singx Nzung 55:20-23

+ Lewi 21:13-22:16; Maako 7:1-8

IH HNOI NYEI GING SOU:

Meih gorngv, ‘Yie maiv zoux dorngc haaix nyungc. Tin-Hungh ga’qiex fiu mi’aqv. Maiv qiex jiez yie aqv.’ Mangc maah! Yie zungv oix bun meih zuqc siemv zuiz, weic zuqc meih gorngv, ‘Yie maiv baamz zuiz.’ (Ye^le^mi 2:35)

“Yesu aah! Meih daaih zoux hungh nyei ziangh hoc, tov jangx deix yie oc.”

(Lugaa 23:42)

ZA’EIX TENGX DAUX GAUX:

Ziouv aac, yie mengh baeqc da’yietv yiemc Ging Sou gorngv se mouz laanh Giduc mienh yie mbuo yietc zungv se baamz zuiz nzengc nor yie yaac maiv haih gorngv: ‘Yie maiv zoux dorngc haaix nyungc. Tin-Hungh ga’nqiex fiu mi’aqv. Maiv qiex jiez yie aqv.’ Maiv gunv yie maiv zeiz oix baamz zuiz fai baamz zuiz faix nyei mv baac yaac se zuiz yiem Ziouv nyei nza’hmien aqv. Tov Ziouv zoux bun yie aengx dimv mangc yie nyei ziangh maengc, nyiemc hiuv yie nyei zuiz, goiv hnyouv guangc zuiz gapv Ziouv haih duqv Ziouv guangc zuiz. Se gorngv yie ceng hlo, gorngv se yie maiv baamz zuiz nor Ziouv dimv mangc nyungc-nyungc yie zoux nyei sic, za’eix gapv mienh muoz. Yie gengh hnamv se dingc hnyouv faix fim yiem yie hnamv hnyouv nyei sic, yiem yie nyei waac gorngv. Laengz zingh Ziouv.

Hnoi 26 – Hlaax 04

• 

• 

DOQC GING SOU:

+Singx Nzung 55:16-19

+ Lewi 20:9-21:12; Maako 6:45-56

IH HNOI NYEI GING SOU:

Oix zuqc gamh nziex, taaih Tin-Hungh ei jienv ninh nyei leiz-latc zoux. Naaiv se yietc zungv baamh mienh oix zuqc zoux nyei buonc.

(Gorngv Seix Zaangc 12:13b)

Yesu dau, “Gauh longc jienv jiex nyei leiz se dongh naaiv. ‘I^saa^laa^en Mienh aac, muangx longx oc. Mbuo nyei Ziouv, Tin-Hungh, se nduqc dauh Ziouv hnangv. Oix zuqc longc nzengc hnyouv, longc nzengc za’eix, longc nzengc cong-mengh, yaac longc nzengc qaqv hnamv Ziouv, meih nyei Tin-Hungh.’ Da’nyeic diuh leiz se dongh naaiv, ‘Oix zuqc hnamv mienh hnangv hnamv ganh nor.’

(Maako 12:29-31)

ZA’EIX TENGX DAUX GAUX:

Ziouv aac, i yiemc Ging Sou ih hnoi dorngz henv nyei taux yie nyei m’nqorngv faamv, zoux bun yie dimv mangc yie nyei ziangh maengc gan Ziouv mingh. Yie ih zanc bun jienv yie hnamv oix nyei sic, naaiv baamh gen nyei njien-youh gunv jienv yie div bun bangc kaux Ziouv, maiv bun Ziouv njaaux yaac mbuox yie nyungc-nyungc ginv nyei ga’naaiv yiem yie nyei ziangh maengc. Yie ih zanc ziangh weic yie buatc haaix nyungc horpc bun yie div bun guaax hnyouv, hnamv yaac korv-lienh taux wuov deix  mienh Ziouv mbenc ziangx yiem nitv fatv yie. Yie gengh hnamv se longc nzengc hnyouv, longc nzengc lingh wuonh, longc nzengc cong-mengh, longc nzengc qaqv taaih Ziouv yaac hnamv taux ganh dauh, zoux duqv zunh Ziouv jiu bun nyei gong. Laengz zingh Ziouv.