DLĂNG KLEI AÊ DIÊ BLŬ:
* Klei Mmuñ Hđăp 68:7-18
* Klei Yap 11; Y-Markôs 13:1-13
ÊLAN KLEI AÊ DIÊ BLŬ HLĂM HRUÊ:
Kâo gơ̆, Yêhôwa, jing Pô kiă,
Kâo krih êa kơ ñu nanao,
Kâo kiă kriê ñu hruê leh anăn mlam, huĭ arăng ngă jhat kơ ñu.
(Y-Êsai 27:3)
Aê Diê jing sĭt suôr, leh anăn Ñu amâo brei ôh klei mplư truh kơ diih êgao hĭn kơ ai ktang diih, ƀiădah mbĭt hŏng klei mplư anăn Ñu srăng mkra mơh êlan diih dưi tlaih, čiăng kơ diih dưi gĭr tŭ klei anăn. (I Kôrantô 10:13)
ĐRU KČĔ KLEI WAH LAČ:
Ơ Khua Yang, kâo khăng êdu ai, ƀuah ăl lač ya ngă Khua Yang lui phung đăo hmei truh klei dleh dlan, knap mñai, klei truh dleh wăt kơ hmei đăo leh anăn kkuh mpŭ kơ Khua Yang. Êlan Klei Aê Diê Blŭ hruê anei mñă kơ kâo phung đăo kơ Khua Yang hmei amâo dôk hjăn ôh wăt kơ hmei dôk hdĭp hlăm klei truh mmăt tĭt anăn. Khua Yang ƀuăn rơ̆ng hŏng hmei: “Kâo kiă kriê ñu hruê leh anăn mlam, huĭ arăng ngă jhat kơ ñu.”
Kâo đăo sĭt Khua Yang srăng thiăm ai ktang kơ hmei dưi găn jih klei truh hlăm klei hdĭp. Kâo wah lač bi ala kơ phung dôk hdĭp hlăm anôk kbưi hưi hăk, klei dleh dlan huĭ hyưt dôk jŭm dar amâodah klei arăng ngă jhat, klei kbah knap ư̆ êpa êjai dôk hlăm klei bi bhah, klei truh mơ̆ng lăn adiê… akâo Khua Yang yua Klei Aê Diê Blŭ hruê anei bi juh leh anăn bi mđĭ ai digơ̆ ăt đăo knang kơ Khua Yang. Bi mni Khua Yang.