Hruê 16 – Mlan 04

• 

• 

DLĂNG KLEI AÊ DIÊ BLŬ:

* Klei Mmuñ Hđăp 66:8-15

* Klei Yap 7:36-71; Y-Markôs 11:27-12:12

ÊLAN KLEI AÊ DIÊ BLŬ HLĂM HRUÊ:

Mơ̆ng anôk Ih dôk ti dlông, Ih krih čư̆;

lăn ala bŏ hŏng klei jăk jĭn Ih brei.

 (Klei Mmuñ Hđăp 104:13)

Leh digơ̆ ƀơ̆ng tơl trei, Yêsu lač kơ phung ƀĭng kna Ñu, “Duñ bĕ djah kpŭng kan êbeh, đăm bi luč hơăi mang ôh.” Snăn diñu hrui djah anăn leh anăn bi bŏ pluh dua bai hŏng djah mơ̆ng êma klŏ kpŭng mdiê ôrgơ, tơdah jih jang mnuih ƀơ̆ng leh.

 (Y-Yôhan 6:12-13)

ĐRU KČĔ KLEI WAH LAČ:

Ơ Khua Yang, kâo thâo săng êlan Klei Aê Diê Blŭ hruê anei iêu mthưr kâo brei kriăng mă bruă leh anăn hdĭp kreh kriêm, amâo bi liê hơaĭ mang klei thâo, klei myun wăt hŏng jih mnơ̆ng Khua Yang brei. Akâo Khua Yang đru kâo hur har yua jih klei myun čiăng ngă jih bruă Khua Yang jao hlăm gŏ sang, anôk mă bruă, hlăm Sang Aê Diê. Akâo Khua Yang đru kâo thâo yua jih mnơ̆ng Khua Yang brei, lŏ yua jih mnơ̆ng anăn hŏng klei djŏ găl, thâo yua prăk Khua Yang brei djŏ klei kñăm, amâo bi liê hơăi mang ôh. Kâo ăt wah lač kơ phung khua gĭt gai thâo huĭ mpŭ kơ Khua Yang, thâo mĭn hlăm klei yua mnuih, mdưm hlăm bruă bi djŏ, mtô mjuăt phung ênuk êdei čiăng dưi lŏ čuê bi mđĭ bruă Khua Yang brư̆ hruê ba boh tŭ dưn hĭn. Bi mni kơ Khua Yang.