DLĂNG KLEI AÊ DIÊ BLŬ:
* Klei Mmuñ Hđăp 77:10-15
* Klei Yap 32:28-42; Y-Luk 2:33-40
ÊLAN KLEI AÊ DIÊ BLŬ HLĂM HRUÊ:
Rah bĕ kơ diih pô klei kpă ênô, wiă bĕ boh mơ̆ng klei jăk;
kai bĕ lăn diih lui êhŏng, kyuadah truh leh mông duah Yêhôwa,
tơl kơ Ñu dưi hriê leh anăn tuh êa hjan klei kpă ênô ti dlông diih.
(Y-Ôsê 10:12)
Leh anăn Yêsu blŭ sa klei bi hriêng kơ digơ̆, lač, “Lăn sa čô mnuih mdrŏng mboh lu, leh anăn ñu mĭn hlăm ai tiê ñu, ‘Ya kâo srăng ngă, kyuadah kâo amâo lŏ mâo anôk pioh mdiê kâo ôh?’ Leh anăn kâo srăng lač kơ mngăt kâo pô, Mngăt kâo ơi, ih mâo lu dŏ dô mkăm leh pioh kơ lu thŭn. Mdei bĕ ih, huă ƀơ̆ng, mnăm, leh anăn dôk hơ̆k mơak.’ Ƀiădah Aê Diê lač kơ ñu, ‘Ơ mnuih mluk! Mlam anei Aê Diê srăng sua mă mngăt ih. (Y-Luk 12:16-17a, 19-20)
ĐRU KČĔ KLEI WAH LAČ:
Ơ Khua Yang, hruê anei kâo akâo wah lač kơ phung mdrŏng ti lăn ala anei. Akâo Khua Yang mtrŭt digơ̆ uêñ mĭn kơ klei bi mtlaih mngăt digơ̆ pô leh anăn uêñ hdĭp hŏng klei êhăk êhai hŏng jih jang mnuih, boh nik hŏng phung mă bruă kơ digơ̆ čiăng dưi wiă boh klei khăp dơ̆ng mơ̆ng bruă ngă hŏng klei brei kmah. Akâo Khua Yang brei kơ digơ̆ thâo klei mdrŏng sah digơ̆ jing klei jăk jĭn mơ̆ng Khua Yang brei wăt digơ̆ ka đăo kơ Khua Yang. Akâo Khua Yang mtrŭt phung đăo mdrŏng sah hlăm mnơ̆ng dhơ̆ng brei uêñ kơ klei myơr mă bruă kơ Khua Yang êjai digơ̆ adôk mâo klei myun hdĭp ti lăn ala. Kâo ăt hdơr djă pioh klei Khua Yang mtô čiăng mă yua hlăm klei hdĭp: hdĭp hŏng klei kreh kriêm, amâo bi liê hơaĭ mang, thâo kah mbha hŏng pô mkăn wăt kâo ka mdrŏng sah. Bi mni kơ Khua Yang.