DLĂNG KLEI AÊ DIÊ BLŬ:
* Klei Mmuñ Hđăp 77:1-9
* Klei Yap 31:48-32:27; Y-Luk 2:21-32
ÊLAN KLEI AÊ DIÊ BLŬ HLĂM HRUÊ:
Leh anăn jih jang phung ƀuôn sang ur driâo kraih ktang êjai diñu mpŭ mni kơ Yêhôwa, kyuadah arăng mdơ̆ng leh atur sang yang Yêhôwa. (Y-Êsra 3:11b)
Kyuadah amâo mâo atur mkăn ôh Aê Diê dưi dưm, knŏng atur Ñu dưm leh, jing Yêsu Krist. (I Kôrantô 3:11)
ĐRU KČĔ KLEI WAH LAČ:
Ơ Khua Yang, tơdah kâo đăo leh kơ Khua Yang Yêsu, Khua Yang mtrŭt kâo ngă hlue klei Khua Yang mtô mtă. Kâo thâo săng knhuah hdĭp phung đăo kơ Khua Yang jing sang yang dưi mdơ̆ng leh ti dlông atur jing Khua Yang Yêsu, čiăng lač jing jih jang grăp čô phung đăo jing sang yang anôk Khua Yang dôk. Sang yang grăp čô hmei mdơ̆ng leh kơ Khua Yang jing sang yang doh jăk, kjăp hlăm klei đăo, thâo săng klei Khua Yang mtô, yua hlăm knhuah hdĭp grăp hruê, mâo klei mngač Khua Yang mtrang… wăt si klei hdĭp dleh dlan, knap mñai snăn grăp “sang yang phung đăo kơ Khua Yang” ăt dôk kjăp, ai tiê êđăp ênang, amâo rŭng răng ti anăp klei truh anăn. Akâo Khua Yang đru phung hmei tŭ gĭr jih klei hdĭp mdơ̆ng sang yang anei, dôk nanao hlŏng lar hlăm Ƀuôn Aê Diê. Bi mni lač jăk kơ Khua Yang.